ಬೆಳಗೆರೆ ಕೃಷ್ಣಶಾಸ್ತ್ರಿಗಳು ಅಪೂರ್ವ ಅನುಭಾವಿ. ಅನುಭಾವವೆನ್ನುವುದು ನಿಗೂಢದ ಕಥೆ ಅಲ್ಲ; ಅದು ಚೈತನ್ಯದ ಕ್ಷಣಗಳನ್ನು, ತಿಳಿವಿನ ವಾತಾವರಣವನ್ನು ಹುಡುಕುವ; ಹಾಗೆ ಹುಡುಕಿದ್ದನ್ನು ಅರಿಯುವ; ನಿಬ್ಬೆರಗಿನಿಂದ ಮೆಲುಕುಹಾಕುವ; ಗತಿಶೀಲತೆ. ಇಂಥ ಗತಿಶೀಲತೆಯ ಅನುಭವವನ್ನು ಕೃಷ್ಣಶಾಸ್ತ್ರಿಗಳು ಮೈದುಂಬಿ, ಮನದುಂಬಿ, ತನುತುಂಬಿ ಪಡೆದಿದ್ದಾರೆ. ಹಾಗೆ ಪಡೆದಿದ್ದನ್ನು ಅನುಭವವಾಗಿಯೇ ಮಾತುಗಳಲ್ಲಿ ಹಂಚಿಕೊಂಡಿದ್ದಾರೆ.

ತಿಳಿವಿನ ಅನುಭವಕ್ಕೆ ಮಾತುಗಳ ಮೂಲಕ ಪಾರದರ್ಶಕತೆ ಸಾಧ್ಯವಾಗುವುದು ಅನುಭಾವದ ಒಂದು ಮುಖ್ಯ ಸಾಧನೆ. ಕೃಷ್ಣಶಾಸ್ತ್ರಿಗಳ ಮಾತುಗಳಿಗೆ ಈ ಗುಣ ಲಭ್ಯವಾಗಿದೆ. ಇಲ್ಲಿ ರೂಪು ತಳೆದ ಹಲವಾರು ವ್ಯಕ್ತಿಚಿತ್ರಗಳು ಕೃಷ್ಣಶಾಸ್ತ್ರಿಗಳ ಸೂಕ್ಷ್ಮ ಅವಲೋಕನದ ಭಾಗವಾಗಿಯೇ ಮೈತಳೆದು ಬಂದಂಥವು. ಇವುಗಳು ನೆನಪಿನ ಭಾಗಗಳೆಂಬಂತೆ ಆಗದೆ ಅರಿವಿನ ರೂಪಕಗಳಾಗಿ ಹೊಸ ಅನುಭವ ಸಾಧ್ಯತೆಯನ್ನು ಓದುಗರಲ್ಲಿ ಹುಟ್ಟಿಸುತ್ತದೆ.