ಯಾವುದೇ ಒಂದು ಜೀವಿಯ ಜೀವಿತಾವಧಿಯಲ್ಲಿ ಅತ್ಯಂತ ಅಪಾಯದ ಸಮಯವೆಂದರೆ, ಹುಟ್ಟಿದ ಮೊದಲ ಕೆಲವು ವರ್ಷಗಳು. ಇದಕ್ಕೆ ಮಾನವರೂ ಕೂಡ ಹೊರತಲ್ಲ. ಅಪಾಯ ಎಂದಾಗ ಅದು ಸಾವಿರಬಹುದು, ವಿವಿಧ ರೀತಿಯ ದೌರ್ಜನ್ಯವಿರಬಹುದು, ಹಿಂಸೆ ಇರಬಹುದು. ವಿಶ್ವದಾದ್ಯಂತ ಪ್ರತೀ ವರ್ಷ ಮಿಲಿಯನ್‌ಗಟ್ಟಲೆ ಮಕ್ಕಳು ದೌರ್ಜನ್ಯಕ್ಕೆ-ಹಿಂಸೆಗೆ ಬಲಿಯಾಗುತ್ತಿದ್ದಾರೆ. ಮೇಲ್ನೋಟಕ್ಕೆ ತುಂಬಾ ಮಕ್ಕಳು ಸಂತೋಷವಾಗಿ, ಆರೋಗ್ಯವಂತರಾಗಿ, ತಮ್ಮ ಕುಟುಂಬದಲ್ಲಿ ಬಾಳುತ್ತಿರುವಂತೆ ಕಂಡುಬಂದರೂ ಅದೇ ಸಮಯದಲ್ಲಿ, ಹಲವಾರು ಮಕ್ಕಳು ಸಮಾಜದಲ್ಲಿ, ಕುಟುಂಬದಲ್ಲಿ ದೌರ್ಜನ್ಯಕ್ಕೆ ಒಳಗಾಗಿ ನರಳುತ್ತಿರುವುದೂ ಸತ್ಯಸಂಗತಿ. ಬಹಳಷ್ಟು ಬಾರಿ, ತಮಗೆ ತಿಳಿದವರಿಂದಲೇ ದೌರ್ಜನ್ಯಕ್ಕೆ ಒಳಗಾಗುತ್ತಾರೆ. ಈ ಮಕ್ಕಳೆ ಬೆಳೆದು, ನಾಳೆ ನಮ್ಮ ಸಮಾಜದ ಜವಾಬ್ದಾರಿಯುತ ಪ್ರಜೆಗಳಾಗಬೇಕು. ಮೊಗ್ಗಾಗಿರುವಾಗಲೇ ಚಿವುಟಿ ಹೋಗದಂತೆ, ಹೂಮನ ಬಾಡದಂತೆ ನೋಡಿಕೊಳ್ಳುವುದು ನಮ್ಮೆಲ್ಲರ ಕರ್ತವ್ಯ. ಈ ನಿಟ್ಟಿನಲ್ಲಿ ಈ ಪುಸ್ತಕ ಮೂಡಿಬಂದಿದೆ.