ಅನೇಕ ಜನ, ಪ್ರಾಥಮಿಕ ಅಗತ್ಯಗಳ ಪೂರೈಕೆಯಿಂದ ಹಿಡಿದು, ಭೋಗ-ಭಾಗ್ಯ, ಪ್ರಶಸ್ತಿ, ಗೌರವ, ಸೃಜನಶೀಲ ಸಾಧನೆ, ಮೋಕ್ಷ ಹೀಗೆ ತಮ್ಮತಮ್ಮದೇ ಆದ ಗುರಿಗಳನ್ನು ಹಾಕಿಕೊಳ್ಳುತ್ತಾರೆ. ಸಾಧಿಸಲು ಪ್ರಯತ್ನ ಮಾಡುತ್ತಾರೆ. ಗುರಿ ಮುಟ್ಟುವುದೇ ಅವರ ಜೀವನದ ಧ್ಯೇಯವಾಗುತ್ತದೆ. ಇದರಲ್ಲಿ ಯಶಸ್ಸನ್ನು ಪಡೆಯುವುದು ಹೇಗೆ? ಕೆಲವರು ಗುರಿ ಇಟ್ಟುಕೊಳ್ಳುವ ಗೋಜಿಗೇ ಹೋಗುವುದಿಲ್ಲ. ಹೇಗೋ ಬದುಕುತ್ತಾರೆ. ಗಾಳಿ ಬೀಸಿದೆಡೆಗೆ, ಪ್ರವಾಹ ಕೊಂಡೊಯ್ದ ಕಡೆಗೆ ಸಾಗುತ್ತಾರೆ. ಗುರಿಯ ಆಯ್ಕೆ ಹೇಗೆ ? ಎಂತಹ ಗುರಿ ನಮ್ಮದಾಗಿರಬೇಕು ? ಮಾರ್ಗ ಹೇಗಿರಬೇಕು ? ಸ್ಪರ್ಧೆಗಳು, ಒತ್ತಡಗಳು ಹಾಗೂ ಬಹುವಿಧ ಮಾಧ್ಯಮಗಳಿಂದ ಚಂಚಲಗೊಳ್ಳುತ್ತಿರುವ ನಮ್ಮ ಯುವಜನತೆಯ ಚಿತ್ತಗಳು ಗುರಿಯತ್ತ ಮೊಗಮಾಡಲು ಈ ಪುಸ್ತಕದ ಓದು ಸಹಕಾರಿ.