ಗ್ರಾಹಕ ಸಂರಕ್ಷಣೆಯ ವಿಷಯ ಬಂದಾಗಲೆಲ್ಲ ಮುಂಚೂಣಿಯಲ್ಲಿ ಕೇಳಿಬರುವ ಹೆಸರು ವೈ.ಜಿ. ಮುರಳೀಧರನ್ ಅವರದು. ತಮ್ಮ ಜೀವಿತದ ಬಹುಪಾಲು ಸಮಯವನ್ನು ಬಹುಜನರ ಹಿತಕ್ಕೆ ಆ ಮೂಲಕ ಸ್ವಾಸ್ಥ ಸದೃಢ ಸಮಾಜ ನಿರ್ಮಾಣಕ್ಕೆ ಮೀಸಲಿಟ್ಟಿರುವ ಮುರಳೀಧರನ್ ಮೂಲತಃ ಸಾಹಿತ್ಯದ ವಿದ್ಯಾರ್ಥಿ. ಕಾನೂನು, ನಾಗರೀಕ ಸೇವೆ, ಕಲಾ ಮೀಮಾಂಸೆ, ಧರ್ಮ, ಶಿಕ್ಷಣ ಮುಂತಾದ ವಿಷಯಗಳಲ್ಲಿ ಕೂಡ ಪರಿಶ್ರಮವಿರುವ ಇವರು ಏಕಕಾಲಕ್ಕೆ ಅಧಿಕಾರಿಗಳಿಗೂ ಗ್ರಾಹಕರಿಗೂ ವಿಷಯಗಳನ್ನು ತಲಸ್ಪರ್ಶಿಯಾಗಿ, ಸರಳವಾಗಿ ಆದರೆ ಅಥೆಂಟಿಕ್ ಆಗಿ ತಿಳಿಸಿಕೊಡಬಲ್ಲವರು. ಗ್ರಾಹಕ ಚಳುವಳಿಯ ಒಳ-ಹೊರಗುಗಳನ್ನು ಬಲ್ಲ ಅವರು ಆ ಚಳುವಳಿಗೆ ಬೇಕಾದ ತಾತ್ವಿಕ ಮತ್ತು ತಾಂತ್ರಿಕ ವಿಚಾರಗಳನ್ನು ನಿರಂತರವಾಗಿ ಒದಗಿಸುತ್ತಿರುವವರು.