ಬರ್ನಾರ್ಡ್ ಹಾರ್ಟ್ ಬ್ರಿಟೀಷ್ ವೈದ್ಯ, ಮನೋವಿಜ್ಞಾನಿ ಹಾಗೂ ಪ್ರಾಧ್ಯಾಪಕ ‘ಬುದ್ಧಿಭ್ರಮಣೆ’ ಅರ್ಥಾತ್ ‘ಹುಚ್ಚು’ ಎಂದರೆ ಏನು ಎನ್ನುವುದನ್ನು ತಮ್ಮ ಕಾಲದ ಮನೋವೈಜ್ಞಾನಿಕ ದೃಷ್ಟಿಯಿಂದ ವಿಶದವಾಗಿ ವಿವರಿಸಿದ್ದಾರೆ. ಆ ಮೂಲಕ ಬುದ್ಧಿಭ್ರಮಣೆಯ ಕುರಿತಾಗಿ ಜನಸಾಮಾನ್ಯರಿಗೆ ಇರಬಹುದಾದ ತಪ್ಪು ಗ್ರಹಿಕೆಗಳನ್ನು ನೀಗಿಸಲು ಶ್ರಮಿಸಿದ್ದಾರೆ. ಈ ಕ್ಷೇತ್ರ ಈಗ ಹರವಾಗಿಯೂ ಆಳವಾಗಿಯೂ ಬೆಳೆದಿರಬಹುದು; ಇಂಥ ಬೆಳವಣಿಗೆಗೆ ಹಾರ್ಟ್ ಅವರಂಥವರ ಕೊಡುಗೆಯೂ ಇದೆ ಎನ್ನುವುದನ್ನು ಮರೆಯಬಾರದು. ಹಾರ್ಟ್ ಅವರು ಅದೆಷ್ಟು ವ್ಯವಸ್ಥಿತವಾಗಿ ವಿಷಯವನ್ನು ನಿರೂಪಿಸಿದ್ದಾರೆ, ಅದೆಷ್ಟು ಪ್ರೀತಿಯಿಂದ ಪುಸ್ತಕವನ್ನು ರಚಿಸಿದ್ದಾರೆ ಎನ್ನುವುದು ಓದಿದಾಗ ಗೊತ್ತಾಗುತ್ತದೆ. ಅವರ ಈ ಪುಟ್ಟ ಕೃತಿ ಮನೋವೈಜ್ಞಾನಿಕ ಕ್ಷೇತ್ರದಲ್ಲಿ ಒಂದು ಕ್ಲಾಸಿಕ್ ಎಂದೇ ಪರಿಗಣಿಸಲ್ಪಡುತ್ತಿದೆ.