ಭಾರತ ಸ್ವಾತಂತ್ರ್ಯ ಸಂಗ್ರಾಮದಲ್ಲಿ ಸಕ್ರಿಯವಾಗಿ ಭಾಗವಹಿಸಿದವರು ಕೇವಲ ರಾಷ್ಟ್ರೀಯ ಪಕ್ಷಗಳ ನೇತಾರರಷ್ಟೇ ಅಲ್ಲ; ಅವರೊಂದಿಗೆ ಸರಿ-ಮಿಗಿಲಾಗಿ ಇತರ ಪ್ರಜೆಗಳೂ ಹಲವು ರೀತಿಯಲ್ಲಿ ತಮ್ಮದೇ ಕೊಡುಗೆಗಳನ್ನು ನೀಡಿದ್ದಾರೆ. ಎಲ್ಲರ ಗುರಿಯೂ ಪರಕೀಯರ ಆಡಳಿತದಿಂದ ಮುಕ್ತರಾಗುವತ್ತ ಕೇಂದ್ರೀಕೃತವಾಗಿತ್ತು. ಸಾಕಷ್ಟು ಸಂಖ್ಯೆಯಲ್ಲಿ ಪುರುಷರು, ಮಹಿಳೆಯರು, ಸಂಘಸಂಸ್ಥೆಗಳು ತಂತಮ್ಮ ಮಿತಿಯಲ್ಲಿ ದೇಶಪ್ರೇಮವನ್ನು ಮೆರೆದಿದ್ದಾರೆ. ಮುಸ್ಲಿಂ ಮಹಿಳೆಯರೇನೂ ಈ ಹೋರಾಟದಲ್ಲಿ ಪಾಲ್ಗೊಳ್ಳಲು ಹಿಂದು ಮುಂದು ನೋಡಿಲ್ಲ. ಈ ಕೃತಿಯಲ್ಲಿ ಪರಿಚಯಿಸಲಾದ ಮುಸ್ಲಿಂ ಮಹಿಳೆಯರ ಸಂಖ್ಯೆ ಮತ್ತು ಅವರ ಹೋರಾಟಗಳನ್ನು ನೋಡಿದಾಗ ನಾವು ಖಂಡಿತ ಬೆರಗಾಗುತ್ತೇವೆ. ಅಂದಿನ ಕಾಂಗ್ರೆಸ್ ನೇತಾರರೊಂದಿಗೆ ತಮ್ಮನ್ನು ಗುರುತಿಸಿಕೊಂಡು ಈ ಮಹಿಳೆಯರು ತಮ್ಮ ದಿಟ್ಟತನದಿಂದ ತಾವು ಯಾರಿಗೂ ಕಡಿಮೆಯಿಲ್ಲವೆಂಬಂತೆ ಶಕ್ತಿ-ಸಾಮರ್ಥ್ಯಗಳನ್ನು ತೋರ್ಪಡಿಸಿದ್ದಾರೆ. ಅತಿಕಷ್ಟದಿಂದ ಲೇಖಕರು ಈ ಮಹಿಳೆಯರ ಬಗ್ಗೆ ಮಾಹಿತಿ ಸಂಗ್ರಹಿಸಿಕೊಟ್ಟಿದ್ದಾರೆ.