ಸುಬ್ರಹ್ಮಣ್ಯನ್ ಚಂದ್ರಶೇಖರ್ 19 ವರ್ಷದ ಹುಡುಗ. ಭಾರತದಿಂದ ಇಂಗ್ಲೆಂಡಿಗೆ ಹೊರಟಿದ್ದ. ಎರಡು ವಾರಗಳ ಹಡಗು ಪಯಣ. ಕಣ್ಣು ಹಾಯಿಸಿದೆಡೆಯಲ್ಲೆಲ್ಲ ನೀರು. ರಾತ್ರಿಯ ಆಕಾಶದ ತುಂಬಾ ನಕ್ಷತ್ರಗಳು! ಈ ನಕ್ಷತ್ರಗಳಿಗೆ ಹುಟ್ಟು, ಬದುಕು ಮತ್ತು ಸಾವಿದೆಯೆ? ನಮ್ಮ ಸೂರ್ಯನೂ ಒಂದು ನಕ್ಷತ್ರವಲ್ಲವೆ! ಅವನೂ ಒಂದು ದಿನ ಸಾಯುವನೆ? ಹೀಗೆ ಹಲವು ಹತ್ತು ಪ್ರಶ್ನೆಗಳು ಯುವಕನನ್ನು ಕಾಡಿದವು. ತಕ್ಷಣವೇ ತಾನು ಅದುವರೆಗೂ ಕಲಿತಿದ್ದ ಗಣಿತ ಹಾಗೂ ಭೌತಶಾಸ್ತ್ರದ ಆಧಾರದ ಮೇಲೆ ಲೆಕ್ಕ ಹಾಕಲು ಆರಂಭಿಸಿದ. ಇಂಗ್ಲೆಂಡ್ ತಲುಪುವುದಕ್ಕೆ ಮೊದಲೇ ತನ್ನ ಲೆಕ್ಕಾಚಾರವನ್ನು ಮುಗಿಸಿದ. ನಮ್ಮ ಸೂರ್ಯನ ದ್ರವ್ಯರಾಶಿಗಿಂತ 1.44 ಪಟ್ಟು ಅಥವಾ ಕಡಿಮೆ ಇರುವ ನಕ್ಷತ್ರಗಳು ತಮ್ಮನ್ನೇ ಹಿಂಡಿಕೊಂಡು ಕುಗ್ಗುತ್ತವೆ. ಅತಿಭಾರದ ಕುಬ್ಜರೂಪಿಗಳಾಗಿ ತಮ್ಮ ವೃದ್ಧಾಪ್ಯವನ್ನು ಕಳೆಯುತ್ತವೆ. ಹುಡುಗ ಚಂದ್ರಶೇಖರ್ ಹೇಳಿದ ಈ ಮಾತುಗಳನ್ನು ಜಗತ್ತಿನ ವಿಜ್ಞಾನಿಗಳು ಸುಮಾರು 50 ವರ್ಷಗಳ ಕಾಲ ಪರೀಕ್ಷಿಸಿದರು. ಅನೇಕ ಪ್ರಯೋಗಗಳನ್ನು ನಡೆಸಿ, ನಿಜವೆಂದು ಒಪ್ಪಿಕೊಂಡರು. 19ನೆಯ ವರ್ಷದಲ್ಲಿ ಮಾಡಿದ ಸಂಶೋಧನೆಗೆ 73ನೆಯ ವಯಸ್ಸಿನಲ್ಲಿ ಜಗತ್ತಿನ ಪ್ರತಿಷ್ಠಿತ ನೊಬೆಲ್ ಪ್ರಶಸ್ತಿ ದೊರೆಯಿತು.