ರಹಮತ್ ಅವರಿಗೆ ಸಂಸ್ಕೃತಿಯ ಬಹುಮುಖತೆ ಹಾಗೂ ಅದರ ಅಲಕ್ಷಿತ ನೆಲೆಗಳ ಹುಡುಕಾಟದಲ್ಲಿ ತೀವ್ರ ಆಸಕ್ತಿ. ಅಷ್ಟೇ ಅಲ್ಲ, ಇದುವರೆಗೆ ಆದರ್ಶವೆಂದು ಮಂಡಿತವಾದ ಸಂಸ್ಕೃತಿ ವಿವರಗಳನ್ನು ಅವರು ನಿರಾಕರಿಸುತ್ತಾರೆ; ಹೆಚ್ಚು ಆರೋಗ್ಯಕರವಾದ ಪ್ರತಿಸಂಸ್ಕೃತಿಯ ವಿವರಗಳನ್ನು ತೋರಿಸುತ್ತಾರೆ. ಅವರ ನಿಲುವುಗಳ ಹಿಂದೆ ನೋವಿನ ನಡುವೆಯೂ ಅರ್ಥವಂತಿಕೆ ಹಾಗೂ ಅಭಿಮಾನಗಳನ್ನು ಕಾಪಾಡಿಕೊಂಡ ಜೀವನಕ್ರಮವೊಂದರ ಒತ್ತಡ, ಒತ್ತಾಸೆಗಳಿವೆ.

ತಮ್ಮ ಸಂಸ್ಕೃತಿ ಚಿಂತನೆಗೆ ಆಕಾರ ಕೊಡಲೆಂದು ಸಾಹಿತ್ಯವನ್ನೂ ವಿಮರ್ಶೆಯನ್ನೂ ಬಳಸಿಕೊಳ್ಳುವ ರಹಮತ್, ಸಾಹಿತ್ಯದ ಅನನ್ಯತೆಯನ್ನು ಅಲ್ಲಗಳೆಯುವುದಿಲ್ಲ. ಹಾಗೆಂದು ಪ್ರಾಯೋಗಿಕ ವಿಮರ್ಶೆಯ ಗೋಡೆಗಳ ನಡುವೆ ನಿರಾಳವಾಗಿ ಕೂಡುವುದೂ ಇಲ್ಲ. ಜೀವನ ಮತ್ತು ಸಾಹಿತ್ಯಗಳನ್ನು ಪರಸ್ಪರ ಒರೆಗಲ್ಲುಗಳಾಗಿ ಅವರು ಉಪಯೋಗಿಸುತ್ತಾರೆ. ತಾರುಣ್ಯದ ತೀವ್ರತೆ ಮತ್ತು ಚಿತ್ರ ತುಂಬಿದ ಭಾಷೆಗಳ ಫಲವಾದ ಆಕರ್ಷಕ ಶೈಲಿ ‘ಪ್ರತಿಸಂಸ್ಕೃತಿ’ಯ ಗುಣವಾಗಿದೆ.