ಕ್ಷಣ ಕ್ಷಣಕ್ಕೂ ಹೊಸತನ, ಹೊಸರೂಪ, ರಚನೆ ಹಾಗೂ ಹೊಸ ನಡವಳಿಕೆಗಳನ್ನು ಪ್ರದರ್ಶಿಸಬಲ್ಲ ಪ್ರಕೃತಿ ಆಯಾ ದೇಶ, ಕಾಲಕ್ಕನುಗುಣವಾಗಿ ವಿಕಾಸ ಪಥದಲ್ಲಿ ನಡೆದು ಬಂದಿರುವುದು ಅತಿಶಯೋಕ್ತಿಯಲ್ಲ. ಜೀವಿ ವಿಕಾಸ ತಜ್ಞ ಟಿ. ಡೊಬ್ಸಾಂಸ್ಕಿ ವಿಕಾಸದ ಬೆಳಕು ಮೂಡಿಸದ ಜೀವ ವಿಜ್ಞಾನ ಅರ್ಥಹೀನ ಎನ್ನುತ್ತಾನೆ. ಪರಿಸರದ ಪರಿಕರಗಳನ್ನು ಬಳಸಿ ಸುಸ್ಥಿರ ವ್ಯವಸ್ಥೆ ಮಾಡಿಕೊಂಡಾಗ ವಿಕಾಸ ಸುಮುಖ. ಕೆಲವೊಮ್ಮೆ ಅದು ಸುದೀರ್ಘ, ಕೆಲವೊಮ್ಮೆ ಸುಳಿವಿಲ್ಲದೇ ಸುರುಟಿ ಹೋಗಬಹುದು. ವಿಕಾಸದ ಈ ನಿರಂತರ ಪಯಣದಲ್ಲಿ ಅಪಘಾತಗಳೆಷ್ಟೋ, ಪ್ರಪಾತಕ್ಕೆ ಬಿದ್ದವುಗಳೆಷ್ಟೋ ನಿಖರ ಮಾಹಿತಿಗಳಿಲ್ಲ. ಸಿಕ್ಕಷ್ಟು ಮಾಹಿತಿಗಳಿಂದ ಇಂದಿನ ಜೀವಿ ವೈವಿಧ್ಯಕ್ಕೆ ಸಾಕಷ್ಟು ಪುರಾವೆಗಳು ದೊರೆಕಿವೆ. ಆದರೂ ಅವು ಅಪೂರ್ಣವೇ. ವಿಕಾಸಕ್ಕೆ ಎಂದೂ ಪೂರ್ಣವಿರಾಮವಿಲ್ಲ. ಅದು ಸದಾ ಜರುಗುತ್ತಲೇ ಸಾಗುವುದು. ಹಿಂದೆ ಹಾಗಿತ್ತು. ಇಂದು ಹೀಗಿದೆ, ಮುಂದೆ ಹೇಗಾಗಬಹುದು ಎಂಬ ಚಿಂತನೆಯೇ ವಿಜ್ಞಾನದ ಮಾರ್ಗ. ನಮ್ಮ ಸುತ್ತಮುತ್ತಲಿನ ಹಿರಿ, ಕಿರಿ, ಸೂಕ್ಷ್ಮ ಜೀವಿಗಳ ರೂಪ, ರಚನೆ, ನಡವಳಿಕೆಗಳನ್ನು ಗಮನಿಸಿದಾಗ ವಿಕಾಸದ ಹಾದಿಯಲ್ಲಾಗಿರುವ ಹೊಂದಾಣಿಕೆ, ಬದಲಾವಣೆ ಅರಿವಾಗಬಹುದು. ನಮಗೆಷ್ಟು ತಿಳಿದಿದೆ ಎಂದು ಗೊತ್ತಾಗುವುದು ನಮ್ಮ ಪರಿಸರವನ್ನು ಸೂಕ್ಷ್ಮವಾಗಿ ಗಮನಿಸಿದಾಗ, ಮತ್ತೊಬ್ಬರ ವಿಚಾರಧಾರೆಗಳನ್ನು ಕೇಳಿದಾಗ, ಪುಸ್ತಕಗಳನ್ನು ತೆರೆದು ಓದಿದಾಗ, ಚರ್ಚೆಗಳಲ್ಲಿ ಭಾಗವಹಿಸಿದಾಗ, ಇಷ್ಟೇ ಅಲ್ಲ ಏನನ್ನಾದರೂ ಬೋಧಿಸಲು ತಲೆಕೆಡಿಸಿಕೊಂಡಾಗ ಹಾಗೂ ಯಾವುದಾದರೂ ವಿಷಯದ ಬಗೆಗೆ ಬರೆಯುವ ಸಾಹಸಕ್ಕೆ ಕೈ ಹಚ್ಚಿದಾಗ, ಈ ದಿಶೆಯಲ್ಲಿ ನಡೆಸಿದ ಪ್ರಯತ್ನವೆ ಈ ಕೃತಿ.