ಮಕ್ಕಳೇ ಮನೆಗೆ ಮಾಣಿಕ್ಯವೆಂದೂ, ಮನೆಗೊಂದು ಮಗುವಿರಲೆಂದೂ ಈ ಸಮಾಜ ಬಯಸುತ್ತದೆ. ಮಕ್ಕಳು ಇಲ್ಲದವರನ್ನು ಸಮಾಜ ತಿರಸ್ಕಾರದಿಂದ ಕಾಣುತ್ತದೆ. ಹಲವು ಕಾರಣಗಳಿಂದ ಬಂಜೆ ಎನಿಸಿಕೊಂಡ ಮಹಿಳೆಗೆ ಮಗುವನ್ನು ಪಡೆಯುವ ಸಾಧ್ಯತೆ ವೈದ್ಯಕೀಯ ರಂಗದ ಸಂಶೋಧನೆಗಳಿಂದ ಇಂದು ಯಶಸ್ವಿಯಾಗಿದ್ದು ಜನಪ್ರಿಯವಾಗಿದೆ. ಮಾತ್ರವಲ್ಲದೆ, ಬಂಜೆ ಎಂಬ ಪದ ಇದುವರೆಗೂ ಸ್ತ್ರೀಯರನ್ನಷ್ಟೇ ಉದ್ದೇಶಿಸಿ ಹೇಳಿದ್ದರೂ ಇದು ದಂಪತಿಗಳಿಬ್ಬರಲ್ಲೂ ಇರುವ ದೋಷ ಎಂದು ಇಂದಿನ ವೈದ್ಯಕೀಯ ವರದಿಗಳು ತಿಳಿಸುತ್ತವೆ. ಸಹಜ ಗರ್ಭಧಾರಣೆ ವಿಫಲವಾದ ಸಂದರ್ಭದಲ್ಲಿ ಇನ್ ವಿಟ್ರೊ ಫರ್ಟಿಲೈಸೇಶನ್ ಎಂಬ ವಿನೂತನ ವಿಧಾನ ದಂಪತಿಗಳಲ್ಲಿ ಆಶಾವಾದ ಮೂಡಿಸಿದೆ. ಇದನ್ನು ಸಹಾಯಕ ಸಂತಾನೋತ್ಪತ್ತಿ ತಂತ್ರಜ್ಞಾನವೆಂದು ಕರೆಯಲಾಗಿದ್ದು ವೈದ್ಯಕೀಯ ರಂಗದಲ್ಲಿ ಹೊಸ ಹೆಜ್ಜೆ ಮೂಡಿಸಿದೆ.